Пратеничката група на ЗНАМ, со поддршка од парламентарното мнозинство, поднесе предлог-закон за дополнување на Законот за безбедност на сообраќајот на патиштата по скратена постапка.
Со предложените измени се предвидува возачите со дозвола од Б-категорија да добијат право да управуваат мотоцикли со автоматски менувач од категоријата А1, со зафатнина до 125 кубни сантиметри и моќност до 11 kW, при што односот меѓу силата и масата на возилото не смее да надминува 0,1 kW/кг.
Како што информираше пратеникот Павле Арсоски, ова право ќе може да го користат лица кои имаат наполнето најмалку 23 години, поседуваат возачка дозвола од Б-категорија најмалку пет години и ќе поминат четиричасовна теоретска обука за безбедно управување со мотоцикл во автошкола. Оваа можност ќе важи само на територијата на државата.
Министерот за внатрешни работи ќе треба во рок од 15 дена од стапувањето на сила на законот да ги пропише содржината на обуката, формата на потврдата и начинот на водење евиденција. Автошколите ќе издаваат потврди за завршена обука и ќе го известуваат Министерство за внатрешни работи.
Арсоски истакна дека целта на законот е да се поттикне поголема употреба на мотоцикли, што би придонело за намалување на сообраќајниот метеж и проблемите со паркирањето, особено во урбаните средини како Скопје.
Тој нагласи дека во услови на нефункционален јавен превоз, граѓаните се приморани да користат автомобили, при што најчесто во едно возило се превезува само едно лице. Според него, мотоциклите се практично и економично решение кое зафаќа значително помал простор и може да ја подобри проточноста во сообраќајот.
Дополнително, со зголемена употреба на мотоцикли се очекува и намалување на загадувањето на воздухот, имајќи предвид дека просечната старост на возилата во Македонија изнесува околу 19,5 години, додека поновите мотоцикли ги исполнуваат повисоките еколошки стандарди.
Како предност се посочува и помалата потрошувачка на гориво, што во услови на раст на цените претставува значително олеснување за домашниот буџет.
На крајот, Арсоски апелираше до сите учесници во сообраќајот да ги почитуваат правилата и да водат грижа за сопствената и за безбедноста на другите.
Според европската регулатива, ваква можност веќе постои во повеќе држави, меѓу кои Шпанија, Грција, Франција, Австрија, Словенија и други.
МОЖЕБИ ЌЕ ВЕ ИНТЕРЕСИРА:
