Ракометарите и навивачите на Охрид имаат причина за историско славје, откако клубот го освои својот прв трофеј, и тоа на европската сцена.
ГРК Охрид по вторпат беше подобар од унгарската Татабања во финалето на ЕХФ Европскиот куп, потврдувајќи ја победата и на домашен терен. По триумфот од 29-28 на првиот натпревар во Унгарија, охриѓани вечерва пред преполната сала „Биљанини Извори“ славеа со 31-25 и го подигнаа пехарот.
Првото полувреме мина во израмнета игра и одлични интервенции на голманите. Охридскиот голман Иванковиќ забележа 10 одбрани, додека на спротивната страна Андо имаше една повеќе, 11 интервенции.
Охриѓани во 18. минута стигнаа до највисоки +3 (8-2), но во 20. минута следеше тежок момент за домашните, кога Иванковиќ доби црвен картон. Татабања го искористи тоа и стигна до израмнување (8-8), па дури и до водство (8-9). Сепак, избраниците на Ројевиќ брзо се стабилизираа и на полувреме заминаа со минимална предност од 12-11.
Во второто полувреме Охрид започна силно и со серија од три гола дојде до +4 (15-11), што го натера тренерот на гостите да побара тајм-аут. Но тоа не го промени текот на мечот, бидејќи Охрид продолжи да доминира и во 35. минута стигна до +5 (17-12), по што беше јасно дека патот кон трофејот е отворен. До крајот домаќините рутински ја одржаа предноста и славеа со 31-25.
До историскиот успех Охрид го предводеа Јапонецот Јасухира со 9 погодоци и Словенецот Стрмљан со 6 гола.
Со овој триумф, Македонија стана една од ретките земји која двапати по ред има освојувач на ЕХФ Европскиот куп, откако минатата сезона до трофејот стигна Алкалоид.
МОЖЕБИ ЌЕ ВЕ ИНТЕРЕСИРА:
