Социјалдемократскиот сојуз на Македонија побара оставка од министерот за здравство Сашо Клековски, откако, според партијата, неговата изјава дека „црвените светла“ во Гостивар се запалиле предоцна претставува признание дека институциите не реагирале навреме.
На прес-конференција, членката на Извршниот одбор на СДСМ, Рената Младеновска, оцени дека ваквата изјава ја потврдува одговорноста на институциите за состојбата во Гостивар, каде што, како што наведе, повеќе од четири илјади граѓани побарале лекарска помош.
Од СДСМ тврдат дека жителите на Гостивар со денови користеле загадена вода, а надлежните институции не презеле навремени мерки за спречување на последиците.
Партијата го отвори и прашањето за квалитетот на водата во Болницата за белодробни заболувања во Лешок. Според нив, анализите биле изработени од Центарот за јавно здравје – Тетово во рамки на Националната годишна програма и доставени до Министерството за здравство и до Агенцијата за храна и ветеринарство.
Од СДСМ бараат одговор дали надлежните институции постапиле по добиените резултати, дали пациентите и медицинскиот персонал биле навреме известени и дали биле преземени соодветни мерки за нивна заштита.
Партијата смета дека изјавите на министерот Клековски не ја намалуваат институционалната одговорност и бара целосно расчистување на случајот. Покрај оставка од министерот за здравство Сашо Клековски, СДСМ побара и оставки од директорката на Државниот санитарен и здравствен инспекторат, Ирина Андоновска, и директорот на Институтот за јавно здравје, Александар Миланов.
Воедно, од партијата повикаа на итни контроли и дополнителни анализи на квалитетот на водата за пиење на територијата на целата држава.
МОЖЕБИ ЌЕ ВЕ ИНТЕРЕСИРА:
