Полициски службеници, по наредба на јавен обвинител од Основното јавно обвинителство за гонење на организиран криминал и корупција, го лишија од слобода Ф.С., осомничен за кривично дело „примање награда за противзаконито влијание“.
Според информациите од истрагата, во периодот од октомври до 13 декември 2025 година, осомничениот примил вкупно 50.000 евра со цел да посредува и да го искористи своето реално влијание за интервенција кај судија во Апелациониот суд Скопје. Парите биле побарани за да се изврши службено дејствие кое, според закон, не смеело да се изврши.
Првично, Ф.С. побарал 100.000 евра за да влијае врз укинување на мерка притвор определена за лице кое е недостапно на органите на прогонот и против кое ОЈОГОКК води посебна постапка за кривични дела поврзани со јавните финансии, платниот промет и стопанството.
На 6 октомври 2025 година, осомничениот примил 30.000 евра, кои му биле предадени од сестрата на лицето во бегство. На 13 декември 2025 година, тој директно побарал и примил дополнителни 20.000 евра, како дел од поткупот наменет за судијата.
Непосредно по примањето на паричните средства, осомничениот бил лишен од слобода, а кај него биле пронајдени парите.
Од Кривичниот суд информираа дека е прифатен предлогот на обвинителството и на поранешниот правобранител Фехми Стафа му е определена мерка притвор во траење од 30 дена, поради опасност од бегство и можност за влијание врз сведоци.
МОЖЕБИ ЌЕ ВЕ ИНТЕРЕСИРА:
