Полските власти подготвуваат значајни промени во образовниот систем со цел да го ограничат користењето на мобилните телефони кај учениците и да ја зголемат заштитата на децата на интернет.
Премиерот Доналд Туск најави дека од 1 септември се планира воведување забрана за користење мобилни телефони во училиштата за ученици помлади од 16 години. Според предлогот, децата на возраст од седум до 15 години нема да смеат да ги користат своите телефони ниту за време на наставата, ниту за време на одморите.
Со новите правила, училиштата ќе добијат законска можност да организираат посебни места или шкафчиња каде учениците ќе ги оставаат своите мобилни уреди додека престојуваат во училишниот објект.
Туск изјави дека ваквата мерка е неопходна поради растечката зависност од дигиталните платформи, мобилните игри и социјалните мрежи, која особено ги погодува најмладите генерации.
„Се соочуваме со сериозен цивилизациски проблем. Зависноста од дигиталните содржини може да има сериозни последици врз развојот на децата и врз општеството во целина“, порача полскиот премиер.
Покрај ограничувањата за мобилните телефони, полската влада подготвува и дополнителни мерки насочени кон заштита на малолетниците на интернет. Нов закон ќе ги обврзе интернет-страниците што нудат порнографски содржини да воведат поефикасни механизми за проверка на возраста на корисниците.
Од Министерството за дигитални прашања посочуваат дека проверката на возраста нема да смее да се темели само на изјава од корисникот, ниту пак на биометриски податоци или следење на неговите интернет-активности. Наместо тоа, ќе се бара решение кое ќе обезбеди заштита на приватноста и личните податоци.
Во меѓувреме, полската министерка за образование Барбара Новацка веќе најави и можност за ограничување на пристапот до социјалните мрежи за деца помлади од 15 години.
Додека властите сметаат дека ваквите мерки се неопходни за заштита на младите, технолошките компании предупредуваат дека целосните забрани не се најдоброто решение. Тие посочуваат дека паметните телефони имаат важна улога во образованието, комуникацијата и безбедноста на децата, предлагајќи поголем фокус на родителските контроли и другите форми на надзор наместо целосни ограничувања.
МОЖЕБИ ЌЕ ВЕ ИНТЕРЕСИРА:
