По долг период на алармантно опаѓање, Преспанско Езеро бележи охрабрувачки пораст на водостојот. Според официјалните дневни податоци на Управа за хидрометеоролошки работи, нивото на езерото е зголемено за 48 сантиметри во период од само два месеца.
Зголемувањето е директно поврзано со обилните врнежи од дожд што ја зафатија земјата во периодот од 21 ноември 2025 до 7 јануари 2026 година. Иако дождовите предизвикаа поплави во одредени населени места, дворови и овоштарници, тие во исто време донесоа позитивен пресврт за состојбата на езерото.
Според мерењата извршени на мерната станица во Наколец, на 8 јануари 2026 година водостојот изнесувал 841,36 метри надморска височина. За споредба, на 7 ноември 2025 година нивото било 840,88 метри. Во првиот месец од овој период е регистриран пораст од 27 сантиметри, а во наредните недели дополнителни 21 сантиметар.
Преспанското Езеро со децении се соочува со сериозен пад на водостојот, кој започнал по достигнувањето на историскиот максимум во 1963 година, кога нивото било измерено на 851,83 метри надморска височина. Оттогаш, поради комбинација од климатски промени, прекумерно користење на водните ресурси и природно понирање, водата континуирано се повлекуваше.
Најновиот пораст, иако сè уште далеку од посакуваното ниво, сепак внесува умерен оптимизам дека обновата на езерото е возможна. Преспанското Езеро е заштитен природен споменик, од исклучително значење за биолошката разновидност и претставува едно од најстарите зачувани тектонски езера во светот, со старост поголема од пет милиони години.
МОЖЕБИ ЌЕ ВЕ ИНТЕРЕСИРА:
