Ватикан нема да се приклучи на иницијативата „Комитет за мир“, основана од претседателот на САД, Доналд Трамп, изјави кардиналот Пјетро Паролин, највисок дипломатски претставник на Светата столица.
Паролин нагласи дека решавањето на глобалните кризни ситуации, што е цел на Комитетот за мир, треба да се одвива под водство на Обединетите нации, пренесува Ројтерс.
Според него, Светата столица нема да учествува во Комитетот поради својата специфична природа, која се разликува од онаа на другите држави. Тој истакна дека Ватикан инсистира кризите на меѓународно ниво да се решаваат преку ОН.
Поглаварот на Римокатоличката црква, Папа Лав XIV, во јануари бил поканет да се приклучи на одборот.
Комитетот, според најавите на Трамп, треба да ја надгледува привремената администрација на Појасот Газа по примирјето со Израел, со кое во октомври минатата година заврши војната. Подоцна беше најавено проширување на одборот со цел да се занимава и со други глобални конфликти.
Првиот состанок на Комитетот за мир е закажан за утре во Вашингтон, каде што ќе се разговара за обновата на Газа.
МОЖЕБИ ЌЕ ВЕ ИНТЕРЕСИРА:
