Српскиот претседател Александар Вучиќ изјави дека Европската Унија може да ги реши отворените геополитички прашања во регионот само доколку ги прифати сите држави заедно, без селективен пристап. Тој ова го порача на панел-дискусијата „Европска конкурентност во фрагментирана геополитичка средина“, одржана во рамки на форумот „BELTALKS“.
„Ако прифатите еден, двајца или тројца од нас, што ќе правиме со останатите? Како ќе се справиме со тоа и како ќе ги решиме сите отворени прашања?“, рече Вучиќ, нагласувајќи дека станува збор не само за иднината на регионот, туку и за иднината на Европа.
Тој најави дека утре во Брисел ќе има средби со претседателката на Европската комисија Урсула фон дер Лајен и со претседателот на Европскиот совет Антонио Кошта, на кои отворено ќе ја изнесе својата идеја за заедничко проширување на ЕУ. Според него, таквиот пристап би донел стабилност и позитивно чувство кај сите народи во регионот.
Осврнувајќи се на кризата со Нафтената индустрија на Србија (НИС), Вучиќ изнесе три можни сценарија, нагласувајќи дека 15 јануари е крајниот рок за решение. Првата можност, која ја оцени како малку веројатна, е укинување или суспензија на американските санкции. Втората опција е продажба на мнозинскиот пакет акции на НИС од страна на руските сопственици, додека третата, како последна мерка, е интервенција на државата.
Претседателот истакна дека Србија не смее да го загрози својот финансиски систем или инвестициски рејтинг и додаде дека, според проекциите за економски раст во следните пет години, земјата ќе биде меѓу водечките во Европа. Во своето излагање Вучиќ оцени и дека во наредната година и пол светот се соочува со ризик од голем вооружен конфликт, додавајќи дека и покрај бројните навреди од регионот во изминатиот период, не одговорил на нив.
МОЖЕБИ ЌЕ ВЕ ИНТЕРЕСИРА:
