Македонија и понатаму се соочува со сериозен демографски пад, а најновите податоци на Државниот завод за статистика покажуваат дека негативен природен прираст во првото тримесечје од годинава е регистриран во дури 66 општини.
Според ДЗС, во првите три месеци од 2026 година се родени 3.380 деца, што е за 4,1 проценти помалку во споредба со истиот период лани. Во истиот период починале 5.342 лица, што е намалување од еден процент во однос на минатата година. Меѓу починатите се евидентирани и девет доенчиња.
Податоците на Евростат дополнително ја потврдуваат загрижувачката слика. Македонија се наоѓа меѓу европските држави со најизразени негативни демографски трендови, предизвикани од негативниот природен прираст и континуираното иселување.
Според европската статистика, бројот на жители во земјава за три години е намален за околу 14.500 лица. Во 2022 година Македонија имала 1.837.114 жители, во 2023 година 1.829.954, во 2024 година 1.826.247, а во 2025 година бројката паднала на 1.822.612 жители.
Социологот Илија Ацески оценува дека проблемот е комплексен и дека последиците веќе сериозно се чувствуваат. Според него, коренот на кризата лежи во образовниот систем, економската несигурност и промената на вредносните ставови кај младите генерации.
Во меѓувреме, Македонската православна црква најави формирање фонд за поддршка на многудетни семејства, додека Владата разгледува мерки како даночни олеснувања за мајки, поддршка за семејствата и кампањи за подигнување на јавната свест за демографските проблеми.
Новата власт веќе назначи и специјален советник за намален наталитет, а Министерството за труд доби проширени надлежности за демографија и млади. Сепак, засега нема видливи резултати.
Македонија останува меѓу земјите со сè поголем број пензионери и сè помал број новородени, што дополнително го продлабочува демографскиот предизвик.
МОЖЕБИ ЌЕ ВЕ ИНТЕРЕСИРА:
