Министерството за внатрешни работи објави детали за тешката сообраќајна несреќа што синоќа однесе четири животи на скопската обиколница.
Според информациите од МВР, несреќата била пријавена на 21 мај во 23:00 часот, на делницата меѓу надвозникот Визбегово и клучката Мирковци. Товарно возило „ман“ со полуприколка и косовски регистарски ознаки, управувано од 76-годишниот Б.Б. од Косово, изгубило контрола, ја пробило заштитната метална ограда и навлегло во спротивната насока од автопатот.
Потоа следувал директен судир со патничко возило „БМВ“ со скопски регистарски таблички, управувано од 51-годишниот Р.В. од Скопје.
По ударот избувнал пожар во двете возила. Автомобилот и кабината на камионот биле целосно зафатени од пламен, а пожарот бил изгаснат од екипи на Бригадата за противпожарна заштита на Град Скопје.
На местото на несреќата животот го загубиле возачот на автомобилот Р.В., двајца негови сопатници – А.В. (20) и П.М. (20) од Скопје, како и уште едно лице чиј идентитет сè уште не е утврден.
Смртта ја констатирал лекар од Итната медицинска помош, а по наредба на јавен обвинител телата на загинатите се предадени на обдукција.
Возачот на камионот е лишен од слобода по наредба на јавен обвинител и е задржан во полициска станица, додека истрагата за причините и околностите на трагичната несреќа продолжува.
МОЖЕБИ ЌЕ ВЕ ИНТЕРЕСИРА:
