Голем дел од животот го поминуваме во кревет, убедени дека тоа е местото каде што сме најбезбедни и најодморени. Сепак, реалноста е многу помалку пријатна. Додека спиеме, постелнината постепено се претвора во средина погодна за развој на бактерии, габи и микроскопски паразити. Доколку чаршафите не се сменети повеќе од една недела, нивото на нечистотија во креветот може да биде поголемо отколку на просечна тоалетна школка.
Иако си легнуваме чисти, телото за време на спиењето природно исфрла огромна количина мртви клетки од кожата и лачи значителна количина пот. Се проценува дека во текот на ноќта може да се испоти и до половина литар течност. Комбинацијата од топлина и влага создава идеални услови за размножување на микроорганизми, а бактериите и габите што природно живеат на кожата лесно се префрлаат на перниците и чаршафите.
Мртвите клетки што остануваат во постелнината се главен извор на храна за прашинските грини. Иако се невидливи со голо око, нивниот измет е меѓу најсилните познати алергени. Тој може да предизвика или да ја влоши астмата, егземата, алергиите и хроничниот замор. Често будење со затнат нос, солзави очи или кивање може да биде знак дека спиете во средина богата со овие паразити.
Истражувањата покажуваат дека старите и недоволно одржувани перници можат да содржат десетина различни видови габи. Меѓу нив е и Aspergillus fumigatus, микроорганизам кој кај лица со ослабен имунитет може да предизвика сериозни инфекции на белите дробови.
За да се намали ризикот креветот да стане извор на здравствени проблеми, неопходна е редовна хигиена. Чаршафите и навлаките за перници треба да се перат најмалку еднаш неделно, а доколку имате домашни миленици или обилно се потите – уште почесто. Навлаките за јоргани и ќебињата се препорачува да се перат на висока температура, додека перниците и јорганите периодично треба да се перат или да се носат на хемиско чистење. Перниците постари од две години често се наталожени со прашина и грини и најчесто е подобро да се заменат.
Едноставна, но ефикасна навика е креветот да не се мести веднаш по будењето. Оставањето на постелнината отворена и проветрувањето на просторијата овозможуваат влагата да испари, што значително го отежнува опстанокот на грините. Сончевата светлина и свежиот воздух делуваат како природен дезинфекциски механизам, а пеглањето на чаршафите на висока температура дополнително ги уништува преостанатите микроорганизми.
Постојат и јасни знаци дека перницата повеќе не е безбедна за користење. Жолтеникави дамки, непријатен мирис што останува и по перење, губење на формата, утринско кивање или чешање, како и појава на акни и иритации на лицето, често укажуваат дека перницата е преполна со бактерии и алергени.
Иако креветот изгледа чист на прв поглед, без редовна грижа тој може тивко да стане закана за здравјето. Малите промени во навиките и доследната хигиена прават огромна разлика.
МОЖЕБИ ЌЕ ВЕ ИНТЕРЕСИРА:
