Во последно време се повеќе има вести за играчи кои доживеале колапс на тренинг или натпревар, а последната во низата вакви ситуации заврши со смртен исход.
Фудбалерот на Мускат, Мукалед Ал Ракади (29) почина пред натпреварот од Професионалната лига на Оман помеѓу Мускат и Ал Суваик.
Тој само паднал на земја за време на загревањето, по што медицинските лица веднаш се обиделе да му помогнат. Сепак, немало можност за спас, а се претпоставува дека се работи за срцев удар.
Натпреварот поради трагедијата бил одложен, а сите играчи и навивачи на стадионот биле во шок кога ја дознале трагичната вест.
„Со тага во срцето ја прифаќаме Божјата волја. Управниот одбор на клубот и сите соработници на Мускат упатуваат најдлабоко сочувство до семејството на Ал-Радаки. Го молиме Бога да има милост кон него. Ние му припаѓаме на Бога и ќе се вратиме кај Бога“, се вели во соопштението на клубот.