Поранешниот претседател на Боливија, Луис Арсе, вчера беше префрлен во затворот „Сан Педро“ во Ла Пас, каде ќе помине пет месеци во истражен притвор поради сомнежи за злоупотреба на јавни средства наменети за проекти за домородното население. Истрагата се однесува на периодот кога Арсе ја извршуваше функцијата министер за економија во владата на Ево Моралес, која беше на власт од 2006 до 2019 година.
Со силно полициско обезбедување, Арсе беше изнесен од просториите на Специјалната антикриминална единица во Ла Пас, каде што беше приведен во средата, и пренесен во затвор со возило со затемнети стакла. Затворот „Сан Педро“ се наоѓа во истоимената населба, во близина на историскиот центар на боливиската престолнина.
„Не сме исчезнале, тука сме и невини сме“, изјави Арсе за медиумите по пристигнувањето во затворот.
Денеска тој се појави пред судијата за антикорупција Марио Елмер Лаура, кој одлучи поранешниот шеф на државата да остане во притвор во „Сан Педро“ во период од пет месеци, додека трае истрагата.
На рочиштето, Арсе се изјасни за апсолутно невин и оцени дека неговото апсење е политички мотивирано. Според него, новата влада на претседателот Родриго Паз бара „жртвени јагниња“ со цел да го одвлече вниманието од актуелната состојба во земјата.
Арсе тврди и дека неговото приведување било нелегално, наведувајќи дека бил уапсен од маскирани лица во центарот на Ла Пас, одведен со два автомобила и дека, и покрај неговото барање, првично не му била покажана судска потерница.
Обвинителството го товари за неисполнување на службени должности и постапување спротивно на економската логика, наведувајќи дека како министер одобрил распределба на средства за проекти кои воопшто не биле реализирани или биле само делумно спроведени.
Арсе има 62 години и е член на партијата Движење кон социјализам. Тој беше избран за претседател во 2020 година, а ја напушти функцијата пред еден месец, по изборот на првиот десничарски лидер на Боливија по речиси дваесет години.
МОЖЕБИ ЌЕ ВЕ ИНТЕРЕСИРА:
