Собранието, а не општините, треба да одлучува за прашањето со мигрантите, соопшти СДСМ. Од партијата наведуваат дека премиерот Христијан Мицкоски со денови избегнува јасно да одговори дали ќе ја потпише Резолуцијата со која, како што велат, граѓаните би добиле гаранција дека во Македонија нема да се примаат мигранти за пари.
Наместо директен одговор, според СДСМ, премиерот најавува локални иницијативи преку советници на ВМРО-ДПМНЕ во одредени општини. Од партијата прашуваат зошто Мицкоски не го споменува Собранието како највисок државен орган, составен од пратеници избрани директно од граѓаните, и зошто одговорноста се префрла на општините кои, како што наведуваат, немаат надлежност да одлучуваат за вакво прашање на државно ниво.
СДСМ оценува дека Резолуцијата претставува „народен договор“ и дека само со нејзино усвојување може да се спречи можноста за прием на мигранти на целата територија на државата. Во соопштението иронично се наведува дека недостига уште само иницијативи на ниво на месни заедници.
Партијата повторно го повикува премиерот јавно да одговори дали ќе ја потпише Резолуцијата, нагласувајќи дека се очекува едноставен одговор – „да“ или „не“, не за СДСМ, туку за граѓаните.
Во соопштението се наведува дека постојат повеќе изјави и постапки на функционери од ВМРО-ДПМНЕ кои, според СДСМ, укажуваат на план за прием на мигранти. Меѓу нив се наведува одбивањето да се потпише Резолуцијата, изјавата дека мигранти нема да има „до пролет“, како и тврдењата дека нема да има „нелегални мигранти“, што, според СДСМ, отвора сомнеж за можен легален статус на странски лица преку пазарот на трудот.
Се посочува и на изјавите за носење одлуки на локално ниво, како и на ставовите дека странските работници не треба да се поврзуваат со мигрантите, што, според СДСМ, претставува обид за промена на терминологијата. Дополнително, партијата реагира и на изјави со кои, како што наведуваат, се врши дефокусирање од суштинското прашање – зошто ВМРО-ДПМНЕ одбива да ја поддржи Резолуцијата.
Од СДСМ заклучуваат дека сите овие аргументи укажуваат на скриена агенда и дека токму затоа Резолуцијата не се потпишува.
МОЖЕБИ ЌЕ ВЕ ИНТЕРЕСИРА:
