Хрватскиот преставник во групата Б од регионалната СЕХА лига, Нексе од Нашице, попладнево со 36-32 славеше против македонскиот преставник Вардар 1961.
Во меч кој две третини беше комплетно израмнет, домашните ракометари беа посвежи и поконцентрирани во последната четвртина од дуелот, па бодовите одат на контото на екипата која сега е второпласирана на табелата.
На почетокот Нексе имаше перфектен старт, поведе со 5-0. За краток период избраниците на Стевче Алушевски се вратија во игра, па на семафорот стоеше 5-5.
Нексе со серија од три гола дојде до предност од 8-5, но Вардар повторно покажа квалитет и направи пресврт на резултатот, 9-10.
До крајот на полувремето ниту една од екипите немаше предност поголема од еден гол, па на полувреме се отиде со резултат 15-14 за домашниот тим.
И второто полувреме започна исто онака како што заврши првиот дел. Двете екипи се менуваа во водството се до средината на полувремето кога на семафорот стоеше резултат 22-22.
Оттогаш Нексе „додаде гас“, Вардар беше инфериорен, па за краток период домашниот тим ја врати предноста од +5 од стартот на мечот, 28-23.
Вардар не успеа да ги консолидира редовите за втор пораз во четвртиот меч од групната фаза со резултат 36-32.
За Нексе ова беше трет триумф во петтиот натпревар.
Во победничката екипа најефикасни беа Кевиќ и Јагањац со по 8 гола, а голманот Морено Цар собра 16 одбрани.
Кај Вардар најпрецизен беше Дибиров со 9 гола, додека Гаџа мечот го заврши со 6 гола.
Неприкосновен на чело на табелата во групата Б од СЕХА лигата е тимот на Мотор Запорожје со 3 победи по исто толку натпревари, а на дното на групата е Војводина со 4 порази на исто толку меча.
Во последното коло од групната фаза Вардар гостува кај Војводина, но пред тоа треба да го одиграат одложениот дуел со Мотор Запорожје во Скопје.
МОЖЕБИ ЌЕ ВЕ ИНТЕРЕСИРА:
